Nalunaarut 04. Aug. 2017

Tusagassiutinut nalunaarut.

Assammik arsartartut kattuffiat GHF 21. maj 2017 ileqquusumik ataatsimeersuareernerup kingorna maannamut suliassat amerlasuut pingaaruteqartut aammalu Pan Amerikanske mesterskabinut 2018 Nunatsinni ingerlan­neqartussamut piareersaatit ingerlappaat. Piareersaatit nunatsinni assammik arsarnerup siuarsarne­qartuarnissaanut tunngasut aammalu unammersuartitsinissamut ataqatigiissarneqarnissaanut aningaasalersorne­qarnissaanullu piareersaatit ingerlanneqarlutik. Naak aasarissuugaluartoq Assammik arsartartut kattuffianni ulapaarfiuvoq.

 

Maajip ingerlanerani kujataani Qaqortumi ingerlanneqartumi sungiusaasunut pikkorissaa­titsinerit ingerlanneqarput, taamatuttaaq Nuummi Sisimiuni Ilulissanilu pikkorissaanerit ingerlanneqarput. Pikkorissaanerit sungiusaasutut ilinniartitaanertut ilusilersugaapput, angusinermilu sungiusaasutut allagartartaarnermik kinguneqarfiusumik. Kiisalu aasap ingerlanerani Nuummi assammik arsarluni sammisassaqartitsiviit (håndboldskole) inger­lanneqarpoq, tassani Jakob Larsen pingaarnertut ilitsersuisoralugu, inunnik nammineq kajumissutsiminnik ingerlanneqartoq ikiuuttunillu arlalinnik ikiorneqarlutik ingerlanneqartoq. Kattuffimmit periarfissat taamatut sammisassaqartitsinernut tunngasut annertusarusullugit suliniuteqassalluta aala­jangersimavugut tamannalu sineriammi amerlanerusunik ingerlan­neqartarnissaanik siunertaqartumik siuler­suisuni aallunneqassalluni. Tamatumanili ilaasor­tarisagut timersoqatigiiffiit suliniummut annertusaaqataa­nissaminnik suleqataasinnaaneri aalajangiisuulluinnassasut aamma eqqumaffigivarput.

Assammik arsartartut kattuffiata pilersaarutaasa ilagaat maanna illoqarfiit assammik arsarfioreersut annerusumik piorsarneqarnissaat, aammali illoqarfiit allat tikillugit piorsaaf­figisinnaanissaat pilersaarutaalluni, taamaalilluni assammik arsarnerup illoqarfinni amerla­nerusuni ingerlanneqarsinnaanissaat siunertaalluni. Ilaatigut timer­soqatigiiffiit ingerlanne­qarnermikkut nukittorsarneqarnerisigut sungiusaasoqarniarnikkullu sungiusariaase­qarnikkullu aallaaveqartitsisumik iliuuseqalikkersaarluta siulersuisuini suliniuteqassalluta aalajanger­simavugut.

Pan Amerikanske mesterskabit 2018-mi nunatsinni ingerlanneqartussaq nunatsinni timersornerup oqaluttuari­saanerani pisortatigoortumik unammersuartitsinerit annersaraat, taamaammallu pitsaanerpaamik ataqatigiis­sarlunilu piareersarneqartussaavoq. Inuppassuit nunanit allanit tikerarnissaat qilanaarnartoq pissanganartorlu pimoorullugu piviusun­ngortinniarneqarpoq. Unammersuartitsinissamullu piareersarnermut misileraanerit assigiin­ngitsut ingerlanneqarput, ingerlanneqartassallutillu. Soorlu junimi Qallunaat Nunaanni nunanut allanut unam­misartut U21, nunatsinnilu nunanut allanut unammisartut 3-riarlutik unammisinneqarput.

Inuit nammineq kajumillutik suleqataanissaat avaqqunneqarsinnaanngilaq, taamaattumik aamma tamakku piuk­kunnarsarneqarnissaat pilersaarusiorneqartussaassaaq.

Assammik arsartartut kattuffiata siulersuisui ukiumi arsarfiusussami 2017/2018 pilersaarutitik aallartisassallugit piareersaleruttorput ilaatigut siulersuisuit aggustimi ataatsimiinnissaminni eqqartuiffigeqqitassaminnik. Aap­paagumut unammersuartitsinissat ukiap aallartippallaan­nginnerani aalajangersarneqassapput timersoqatigiiffiillu aaqqissuussisinnaanissaminnut kajumittut suleqatigalugit piareersarneqassallutik. Nunatsinni Assammik arsar­nermik timersoqatigiiffinni suliniuteqartut pitsaanerpaanik atugassaqartinneqarnissaat siunertaralugu siulersuisuni pitsanngorsaataasinnaasunik suliaqarnissarput pingaartillutigu oqaatigis­savarput.

Meeqqat inuusuttullu pillugit suliniutit annertusarneqarnissaanut siulersuisuini sulinitsinni aallaaviulluinnartuupput. Tamatumanilu timersoqatigiiffiit aallussineri qitiulluinnartuunerata pisussaaffilerpaatigut taakkua suleqatiginerisigut suliaq ingerlanneqartariaqarmat. Siulersuisuini neriuutigivarput kajumissusermik tunniussimanermillu pigisallit suleqatigi­sariikkavut nutaallu peqatigiilluta tamanna suliassaq nukittorsaannarnagu tamattaalluta anguniaga­qarfigiumaaripput.  

Unammisartuuneq siuarsaavigissagutsigu pisariaqarluinnartut ilagivaat Nunatsinni unammi­sitsisarnerit allatut aaqqissuussamik iliuuseqarfigineqartariaqarneranik. Unammersuartitsi­sarnerit saniatigut illoqarfikkuutaartumik, nunap ilaanik immikkoortukkuutaartumik unammi­sarnikkut ilaatigut tunngaveqartariaqartoq siulersuisuni isumaqarpugut. Tamatumanili aporfiit piusut ilisimasavut pingaartumillu angallannikkut pissutsit aamma akitigut inissisimanerit qaangerneqarnissaanut iliuuseqaqqaartoqartariaqarneranik siulersuisuni isumaqarpugut. Tamakkua ilaatigut aaqqiivigerusullugit iliuuseqarnissarput aamma siunnerfigivarput angalatitseqatigiiffiit suleqatiginerisigut pingaartumillu kattuffiit allat suleqatiginerisigut aaqqinneqartariaqartut ilanngullugit.

Ikinngutinnersumik inuulluaqqusilluta

Nunatsinni assammik arsartartut kattuffiani siulersuisut.

Nyheder

Kom i kontakt med os

Grønlands Håndbold Forbund
Postboks 335
3900 Nuuk

kontor@ghf.gl

Tilmelding til nyhedsbrev:

Vores seneste Tweets